جمبري مع الخضار بصلصة البندورة وكريمة جوز الهند

المرحلة 1:
1. تذويب الجمبري (استعملت مجمّد)
2. التخلّص من ذيل الجمبري

المرحلة 2:
1. بمقلاة وسيعة نضع زيت زيتون + زبدة (أضفت سمن عضوي لأنه ما كان عندي كمية كافية من الزبدة) ونذيبها على النار.
2. نضع توابل: ملح، فلفل اسود، بابريكا حلوة، أوريغانو مجفف وخليط توابل الحليب الذهبي، ونخلطهم سوية مع خليط الدهون المذاب على النار.
3. نضيف الجمبري المنظّف ونخلطه مع خليط التوابل – ونقلّبه كل شوي لحتى يستوي ع الآخر.
4. عند استواء الجمبري بشكل كامل (يتغيّر لونه لأحمر/زهري) – ننقل الجمبري لوعاء على جنب ونترك الدهون داخل المقلاة.

المرحلة 3:
1. نضيف القليل من زيت الزيتون على المقلاة (اللي فيها بواقي الدهون من المرحلة الثانية) على النار.
2. نضع الخضار على أنواعها ونخلطها مع زيت الزيتون والزبدة على النار: بصل مقطّع مكعبات، فلفل أحمر (مكعبات)، خليط البازيلا والجزر (ممكن يكون مع ذرة وبطاطا وفاصولياء ) مجمّد، بندورة (مكعبات)، .. نضيفهم ورا بعض ونقلّبهم سوية على النار.
3. لما يطروا شوي، نضيف صلصة بندورة (بيتية/ جاهزة (مهم تكون 100% بندورة)) ونخلطها مع الخضار على النار ونغطّي المقلاة ونتركهم على نار متوسّطة لكم دقيقة.
4. نضيف القليل من الماء ونحرّك الخليط ونغطّي المقلاة مرة أخرى – لحتى تكمّل تستوي الخضار.
5. نضيف كريمة جوز الهند – بكمية 1:1 مع صلصة البندورة (يعني صلصة روزيه). ونحرّك الخليط.
6. نتبّل الخضار والصلصة: ملح وفلفل اسود (حسب الحاجة) وريحان مجفف.

المرحلة 4:
نعيد الجمبري على خليط الخضار بصلصة البندورة وكريمة جوز الهند – ونخلطهم سوية بشكل متجانس.

ممكن تعملوا على جنب: أرز/ فريكة/ برغل

صحتين وهنا ع قلبكم،